naay usa ka prinsesa.

di siya makastorya.

apan tanan ginaduol siya.

ginapaningkamutan nila nga maayo iyahang kahimtang.

tungod kay,

pagmuhilak siya kay muolan…

kung mukatawa siya kay maayo ang panahon…

kung masulub-on siya dili mugawas ang adlaw…

kung matulog siya muabot na ang kagabhion…

kung lami iyang katulog, puno ug mga bituon ang langit…

kung damanon kusog kaayo ang mga kilat ug dalugdog….

kung mapungot siya, magbagyo…

kung mutsabaw siya, mubaha…

tanan tao sa kaharian ginapaningkamutan nga mapakatawa, mapahilak, mapatulog ang prinsesa,

kay sa iyaha nakadepende ang maayo nga ani ug panginabuhian sa tanan…apan, mabuhat ra nila kini ug chamba-chamba kay wala man dyud sila nakahibalo kung unsa ang makapalipay o makapasubo sa prinsesa…

usahay, abi nila malipay ang prinsesa, apan mutulo diay ang luha niini…

naay kausa nga nagpapiyesta sila alang sa mahal na prinsesa, apan nasubo man nuon kini pag-ayo ug wala nay undang ang ulan halos usa ka bulan….

naa puy, cge nalang ug katawa ang mahal na prinsesa…gipakuratan nila kini aron mahadlok ug mapungot aron muondang na ang pagka-uga sa panahon ug muabot na dyud ang ulan…apan, nalingaw man nuon ug samot ang prinsesa ug nadugay pa ug samot ang ka-uga…

usa ra dyud unta ilahang ginahangyo…

nga mabasa gyud ang ginahuna-huna sa prinsesa kay dili man siya makastorya…

giampo dyud nila kini sa Kahitas-an…

usa ka-adlaw naay nibisita nga kahibulungan prinsipe, ug pagtan-aw pa lang niya sa prinsesa nakaingon na siya, "nakulbaan ka? ngano man?"

"ah…ginapakusog nako ang pagbuto sa imuhang kasingkasing….mura’g naay naglupad-lupad nga paru-paru sa imuhang tiyan…dili nimo masabtan ngano nalipay ka…."

ug nahibulong tanang mga tao sa kaharian!

nakaingon sila: SIYA NA! siya na ang tubag sa atuang mga pag-ampo! siya ang gipadala aron mabasa ang huna-huna sa atuang mahal nga prinsesa!

sukad niadto nga panahon mabasa na sa prinsipe tanan nga bation sa prinsesa…

iyaha ng mahatag tanan nga panginahanglan niini…

iyaha na siyang mapalipay pirmi…

wala nay kahadlok ug pagduha-duha sa kasingkasing ug huna-huna sa prinsesa…

nabuhi kini sa walay tungkad nga kalipay…

ug kadto pud ang mitsa sa tibuok nga kaharian.

wa nagdugay, ilahang nasayran nga ang ilang gipangayo mao diay magdala nila’g kadautan.

mga pananum nangamatay…

mga yuta nangauga…

mga sapa nangahubas…

mga kahayupan nangawala…

mga tawo nawad-an ug kinabuhi…

ug ang tibuok kaharian nalukop sa kangitngit ug kamatayon…

ang prinsesa?

nagpabiling malipayon kauban iyahang hinigugma.

way kasubo.

hangtud sa ilahang dungan nga pagpanaw…